Categoría

Os vindeiros 9 e 10 de xullo, ás 19:00 h, Javier Burón presentará, nas Delegacións de Vigo e de Lugo do COAG, o seu libro “O problema da vivenda. Como desactivar a bomba de reloxaría que ameaza con colapsar España”.

Javier Burón, especialista en políticas e mercados inmobiliarios, analiza a suba imparable dos prezos, a turistificación, a gentrificación, os investidores globais e as actuacións públicas. Diagnostica o problema, que enfronta a varias xeracións, e explica as súas raíces e consecuencias, comparando modelos da Unión Europea e doutros países. «Por incrible que pareza, nas nosas cidades máis atractivas hai máis ricos pululando que ladrillos e solos á venda». Desa competición especulativa nace o colapso social cara ao que nos encamiñamos.

Este ensaio, o primeiro que se centra nas solucións concretas, a curto e longo prazo, aposta pola creación dun parque público de vivenda asequible e social, incidindo «na calidade máis que na cantidade», cun Estado que controle o mercado e non o desregule. Só así nos liberaremos da expulsión da cidadanía dos núcleos urbanos ata na última cidade de España.

A asistencia é gratuíta. Porén, por cuestións organizativas, é necesario inscribirse nos seguintes enlaces:

• Delegación de Vigo do COAG. Mércores, 9 de xullo, 19:00 h
• Delegación de Lugo do COAG. Xoves, 10 de xullo, 19:00 h