Categoría

A ETSAC vai acoller a xornada A NOVA XESTIÓN DA CIDADE o vindeiro martes 29 de setembro, ás 11:00h.

Preténdese debater sobre a xestión da cidade no novo contexto político actual, para o que contamos coa participación dos responsables de urbanismo de Madrid, Santiago de Compostela, Oviedo, Ferrol e A Coruña: José Manuel Calvo, Jorge Duarte, Nacho Fernández del Páramo, María Fernández Lemos e Xiao Varela, respectivamente.

Os convidados comparten varias circunstancias, son todos arquitectos, novos arquitectos, estréanse nas tarefas de xestión en gobernos municipais liderados polas novas plataformas cidadás e, en todos os casos menos un, son egresados da ETSAC.

O director da Escola, Fernando Agrasar, moderará o debate.

Volvemos…. seguimos coas OLLADAS.

A Praza da Madalena.

Venres 25 de setembro, 19,00 h. Praza da Madalena.

Cidadan: Luis Orero Grandal.

Arquitecta: Elsa E. Borbujo Marín.

“O espírito da paz. Hai uns anos derrubouse aquí unha vella casa, caída ó chan como caen os soños cando esperta o día cheo de incertezas. Seica este lugar foi de antigo a claustra da igrexa de Santa María Madre; logo foi cemiterio medieval e aínda mercado dende mediados do século XIX. É a praza da Magdalena, para Xesús Ferro Couselo, que traballou ó seu carón, o curruncho máis romántico da cidade: é doado coincidir co egrexio arquiveiro. Tamén Vicente Risco se emocionou coa paz e a beleza do seu fermoso cruceiro, que procede da Alameda do Cruceiro. Segundo conta Afonso V. Monxardín no século XVII querían poñerlle portas en Santa María Madre porque, di unha carta ó Correxedor de 1624, ‘ las noches se cometen allí feos y graves pecados usando mal del lugar tan pío’. Hoxe é un dos centros simbólicos da nosa cidade histórica, aínda que moitos ourensáns o ignoren. Nin sequera os poetas lle prestaron os seus versos: é ben sorprendente. Pero tamén reclamo que nunca perda o espírito da paz que impregna a súa fisionomía, a lenta vaguidade das súas sombras e o fecundo silencio das súas pedras enchoupadas de eternidade.”

Marcos Valcárcel.