Debido ao grande interese na presentación e co fin de aumentar o aforo para todos os asistentes inscritos, movemos o acto ao Museo MARCO, a 5 minutos camiñando da Delegación de Vigo.
Deste xeito, o vindeiro 9 de outubro, coincidindo coa celebración do Día Mundial da Arquitectura, terá lugar no Museo MARCO a presentación do número 36 da revista Obradoiro “Urbanidades”, editada por Manuel Bouzas, María Fandiño, Roi Salgueiro e Teresa Sánchez.
Desde a súa creación en 1978, a revista Obradoiro foi un referente na difusión dos valores e achegas da arquitectura galega á cultura, ao territorio e á sociedade. Tras o exitoso relanzamento do ano pasado, co que se puxo fin a trece anos de pausa, continuamos agora co lanzamento do número 36.
Neste número, Obradoiro 36, o Colexio de Arquitectos de Galicia baixo o título “Urbanidades” preséntase como as cidades e vilas, periferias e aldeas, infraestruturas e espazos produtivos conforman un mesmo sistema territorial. As categorías de urbano e rural mestúranse e xa non son dabondo para explicar como habitamos.
Obradoiro 36: Urbanidades propón unha mirada transversal sobre os modos de habitar e construír o territorio galego. Galicia é unha realidade extensa, fragmentada e complexa.
- Día: 9 de outubro.
- Hora: 19,00 h.
- Nova localización: Museo MARCO (Rúa do Príncipe, 54. Vigo) – A 5 minutos camiñando da Delegación do COAG.
Finalizado o acto, servirase un aperitivo para os asistentes na praza do Pobo Galego onde se atopa a Delegación de Vigo.
Moitas grazas a todos polo interese e a grande acollida!