A sesión centrará a súa atención na xestión, conservación e difusión dun conxunto patrimonial de enorme valor histórico e simbólico, así como no papel que desempeña a arquitectura actual na construción do relato institucional e cultural do Estado. A Galería das Coleccións Reais, proxectada polos arquitectos Emilio Tuñón e Luis Moreno Mansilla, consolidouse como unha peza clave no contexto monumental de Madrid e como un exemplo de diálogo entre patrimonio histórico e arquitectura contemporánea.
Víctor Cageao é arquitecto pola Escola Técnica Superior de Arquitectura da Coruña e desenvolve a súa actividade profesional no ámbito da xestión cultural e patrimonial. Actualmente forma parte do equipo directivo vinculado ás Coleccións Reais dentro de Patrimonio Nacional, onde traballa na coordinación e posta en valor de fondos históricos de primeiro nivel. A súa traxectoria combina coñecemento arquitectónico e responsabilidade institucional nun dos organismos culturais máis relevantes do Estado.
A actividade está aberta ao público en xeral e, por motivos de organización, é necesaria a inscrición previa na seguinte LIGAZÓN.
Ao remate da presentación ofrecerase un pincho para favorecer unha conversa distendida co relator.