Esta semana fallouse o primeiro concurso de ideas convocado pola Consellería de Vivenda para a construción de inmobles de promoción pública, neste caso para 140 vivendas no Milladoiro (Ames).
O concurso de ideas, foi impulsado con colaboración do Colexio de Arquitectos de Galicia en base ao modelo que figura no Decálogo de Concursos do COAG, definindo importes de construción e servizos de redacción de proxecto adecuados, realizándoo en 2 fases, a primeira cunha entrega reducida e a segunda retribuída, sen esixir solvencia previa e cun xurado externo.
Presentáronse 129 propostas entre as que se elixiu ás seis finalistas. O deseño gañador corresponde ao proxecto denominado 24 Cruzamentos, da Unión temporal de empresas (UTE) formada por Peris-Toral Arquitectes SCPP e Creus e Carrasco, arquitectos SLP. En segundo lugar quedou a proposta Limiar 00, da arquitecta Mariña Sabela Jordan da Pena. E o terceiro premio foi para o proxecto Trama 26, do equipo de arquitectos formado por Begoña Fernández-Shaw Zulueta, Carlos Rebolo Maderuelo e Alejandro Carballo Llorente. As bases do concurso establecen que o deseño gañador utilizarase para dous edificios, os mesmos que corresponderán ao proxecto que quedou en segundo lugar, mentres que o terceiro se encargará dun quinto bloque.
Ademais o xurado premiou outros tres con accésits. O primeiro foi para En Comunidade, de Javier Couto Granja. O segundo, Mutabl3, dos arquitectos Gabriel Alarcón Sabarís e Inmaculada Hervés González, mentres que o terceiro, 1 Comunidade flexible e permeable, ten como autores a Manuel Jesús Pallas Rodríguez e María Alonso Mosquera.