Intrahistorias da Arquitectura III. Curso en liña de Historia da Arquitectura

0
Posted by / 8 marzo 2021 / Categories: Publicada en Portada, Xornadas / Jornadas / -

Entre o 7 de abril e o 9 de xuño de 2021, terá lugar no Centro Galego de Arte Comtemporánea, os mércores en horario de 19,00 a 20,30 horas, este curso dirixido por Fermín Blanco e Coordinado por Virginia Villar.

Neste terceiro curso sobre as intrahistorias da arquitectura exporemos novos temas e profundaremos noutros xa tratados en edicións anteriores. Partiremos da arquitectura como eixe vertebrador para achegarnos transdisciplinarmente á arte, á cultura, á política, á historia, á artesanía, á economía, á estética e á educación.

Prestaremos especial atención ao material. O vidro, a madeira, a cerámica ou o aceiro e os seus procesos de transformación e creación artesanal ou industrial serán protagonistas este ano. Tamén a linguaxe visual, tan presente nos nosos días, será obxecto de análise e debate.

Falaremos da arquitectura anónima e do concepto de autor. Afundirémonos nos rañainfernos e elevarémonos en xigantes de aceiro. Trataremos a luz, a cor, a transparencia, os esqueletos e as peles. Abordaremos a sempre suxestiva pero en ocasións difícil integración das artes, a creatividade e o compromiso social dunha disciplina que estende a súa capacidade de influencia nas nosas vidas máis aló da peza construída.

METODOLOXÍA 

Neste curso achegarémonos ás bases conceptuais da arquitectura en dez sesións nas que se combinará a exposición dos diferentes temas do programa a cargo de Fermín Blanco coa intervención dos nosos invitados procedentes de diversas disciplinas profesionais.

Os temas elixidos serán transversais a varios campos disciplinarios. Con buscamos fomentar a participación dun público heteroxéneo interesado na arquitectura pero non especificamente experto na materia.

PROGRAMA

7 de abril. Autoprogettazione. Tributo a Enzo Mari

14 de abril. Mestres infiltrados. A arte do vidro e a súa función nas artes decorativas

21 de abril. O Laboratorio de Formas de Sargadelos. Encontro con Xosé Vizoso

28 de abril. Arquitectos inventores. Patentes desde a arquitectura

5 de maio. Integración das artes. De Seoane a Boamistura. Debate

12 de maio. ENSIDESA. Aceiro e movemento moderno

19 de maio. Fernando Higueras: desde a orixe. Por Lola Boitia e Alberto Humanes

26 de maio. Xapón: tradición e tecnoloxía

2 de xuño. Os esquecidos. O silencio do que sabe

9 de xuño. Indicios de que hai arquitectura. Arquivos e territorios. Con Elisa Gallego Picard

FERMÍN BRANCO (La Pola, Asturias, 1977) é doutor arquitecto pola Universidade Politécnica de Madrid e arquitecto pola ETSAVA. A súa traxectoria profesional está impregnada polo carácter educativo e divulgativo dos seus proxectos, sempre nun ámbito híbrido entre disciplinas. Desde 2011 é profesor de Sistemas de Construción na IE School of Architecture and Design. Comeza a súa experiencia profesional co arquitecto Manuel Gallego (2003-2006) e a partir de 2006 exerce a profesión desde o seu propio estudio na Coruña. Durante estes anos realizou exposicións e impartiu cursos e conferencias relacionados coa arquitectura, o deseño e a didáctica. En 2008 funda Sistema Lupo, un paraugas baixo o que actualmente se acubilla un excelente equipo de profesionais implicados no binomio arquitectura-educación. A súa premiada tese de doutoramento, “Los huesos de Fisac: la búsqueda de la pieza ideal”, marcou o inicio dunha serie de proxectos de carácter científico-divulgativo sobre a transferencia do coñecemento desde a técnica e a arte á sociedade. Na actualidade coordina, entre outros, os programas Nenoarquitectura na Fundación Luís Seoane da Coruña, e MIES é + no CGAC. Ademais é cofundador da asociación Ludantia Arquitectura e Educación.

PERSOAS DESTINATARIAS: O curso está dirixido a estudantes, profesorado e público interesado na historia da arquitectura e a historia da arte.

INSCRICIÓN: O prazo de inscrición estará aberto desde o 2 de marzo ata o 5 de abril de 2021. As persoas interesadas poden enviar un correo electrónico a cgac.educacion@xunta.gal no que deberán indicar o seu nome completo, DNI, estudos, área de traballo ou interese, un enderezo electrónico e un teléfono de contacto. Cada solicitante recibirá un correo electrónico de confirmación e as indicacións precisas para realizar o pago da matrícula.

MATRÍCULA: 30 €

CERTIFICACIÓN: O CGAC entregaralles un certificado a todas aquelas persoas que asistan, como mínimo, ao 75 % das sesións.

DIRECCIÓN: Fermín Blanco

COORDINACIÓN: Virginia Villar

Folleto da actividade

About the author

Comentarios pechados.

Visit Us On FacebookVisit Us On TwitterVisit Us On InstagramVisit Us On Youtube